豪食蠔扒

文/攝:CL

 

正所謂「辛苦搵來志來食」。返工做得咁辛苦,放工當然要食餐好嘅慰勞下自己啦。而家喺氹仔住或返工嘅朋友就有口福啦,因為今日我為大家介紹嘅就係澳門銀河入面開設嘅新餐廳—The Apron蠔吧扒房。

 

 

 

顧名思義,餐廳最出名就係食生蠔同牛扒。餐廳經理阿Kim表示,佢哋會精選環球頂尖食材入饌,有新鮮空運嘅生蠔、獲獎並且經過熟成處理嘅牛扒等等,佐以獨家秘制嘅特色醬汁。款式比較多,可以迎合唔同客人嘅口味。

 

據知唔同嘅季節,呢間餐廳都會選用唔同地區嘅生蠔。因為天氣一轉暖,蠔嘅質素就會下降。阿Kim話為左確保生蠔嘅味道同質素,餐牌上面其他生蠔都有可能因應氣候轉變而更換,務求提供到俾顧客嘅食物都喺最新鮮最好。

 

吉拉爾多 (Gillardeau)(MOP 58/隻)

法國諾曼底生蠔 (Normandie)(MOP 38/隻)

咁我就揀咗餐牌上中位價錢嘅法國諾曼底生蠔(Normandie)同最高價錢嘅吉拉爾多(Gillardeau)試下喇。前者入口清新,海水味較重。後者就如同外形一樣,肥美鮮甜,而且蠔嘅味道會殘留喺口腔入面較長時間。而最重要嘅係,兩款生蠔都完全唔腥。就算小編本身好少食生蠔,都忍唔住食多咗幾隻啊。

 

 

 

慢煮8香布蘭特牛肋骨及烤腹肉牛扒配韓式蘿蔔泡菜(MOP348)

試完生蠔,當然要試埋呢度最出名嘅熟成牛同慢煮牛肋骨喇。餐牌上註明可以提供分享份量嘅牛扒,阿Kim就解釋話:「我哋希望改變亞洲人嘅飲食習慣。以前我哋去扒房据扒,一定喺一人一份扒,食完就飽到飛起。但係扒房仲有其他好嘢食,我哋根本無機會試。如果點分享份量嘅扒,兩三個人食啱啱好,個肚仲有空位可以試埋其他嘢。」

 

由於胃嘅容量實在有限,我只喺試到幾款肉扒同沙律,其中比較推薦「慢煮8香布蘭特牛肋骨及烤腹肉牛扒配韓式蘿蔔泡菜。牛肋骨慢煮咗8個鐘頭,肉質入口鬆軟而不散,算喺咁多款肉之中至愛。而旁邊嘅烤腹肉牛扒就用咗花椒、八角等配料烤製而成,適合亞洲人口味。不過腹肉牛扒肥瘦分明,口感較為肥膩,建議一塊牛扒,一舊泡菜,兩樣間住嚟食。值得一讚喺菜式嘅設計,的確大大減低牛扒嘅油膩感。

 

 

 

橡果飼伊比利亞黑毛豬燒烤拼盤及鷹嘴豆燴葡萄牙辣香腸(MOP388)

另外唔食牛嘅朋友可以試下個黑毛豬燒烤拼盤,味道比牛扒更有驚喜。未放入口已經香氣撲鼻,食落口更加可以感受到豬肉本身濃烈嘅香口味道,完全無比醬料或者其他調味料掩蓋,屬於必食之選。

 

除咗肉質,好嘅廚師同爐具喺幫美食加分嘅重要環節,唔喺都唔洗去扒房食喇。聽阿Kim講,呢度嘅廚師每日清潔爐具都要花兩三個鐘頭。因為鐵板喺用訂造嘅生鐵,而且火孔比一般鐵板細密,連牙籤都插唔入。可想而知每次收爐,鐵板嘅溫度會有幾高,淨喺等塊板降溫都等成粒鐘。

 

 

整體嚟講,食物質素都唔錯,以扒房嘅價格嚟講唔算貴。不過以我呢啲打工仔嘅人工梗喺唔可以成日食喇。如果喺Happy Friday、升職加薪或者特別日子,想食餐好嘅慶祝下,The Apron會喺一個唔錯嘅選擇。話說去食飯當晚唔係周末假期,但晚餐時間都坐滿客人,睇嚟有意前往一試嘅朋友訂位先會比較穩陣。

 

 

The Apron蠔吧扒房

地點:澳門路氹城「澳門銀河」綜合度假城
電話:+853 2888 0888

Crazy Barista's Cafe
Facebook