Home專欄職場食好西反暴食主義:八分飽最Perfect池

反暴食主義:八分飽最Perfect池

春天霧雨紛紛,濕氣咁重,搞到一向患有精神病嘅我都冇晒精神,瞓極都覺累,連食慾都失蹤埋。喺呢個咁頹嘅Moment,好彩俾我發現到呢間隱世素食店。沿住永遠塞到阿媽都唔認得嘅水坑尾街直行,轉入小巷,就會見到一間同四周舊樓完全唔同Feel嘅小清新餐廳。

原來呢度係由一直奉行素食主義嘅「Chakra SPACE」主理人打理,依家Crossover埋「Café Philo」嘅咖啡同「若野夢工房」嘅烘培品。新店名「八分目」來自日本俗語「腹八分目」,意思係食到八分飽、留二分空腹,就啱啱好喇!嘩,呢句說話對於我地呢班一日食足5餐、又熱愛放題自助餐嘅澳門人來講,真係當頭棒喝!主理人話希望可以藉住簡約樸素主義令客人減少不必要嘅物慾,所以連菜單都簡簡單單唔駛煩。

 


 

可能你都會好似我當初咁,以為「簡約」等於「冇啖好食」,又驚食完成個純素Dinner Set都唔夠飽。但原來話就話「八分目」,其實套餐裡面有好多款蔬菜,又有足夠澱粉質,食到最後肚仔一定夠晒滿足,而且成餐都係蔬食,少油低脂,飽得嚟唔怕滯住滯住,最緊要係⋯⋯第二朝腸胃暢通,成個人都輕鬆晒。

 

呢度中午時份有意粉、米飯、三文治等簡餐,仲有咖啡同蛋糕,夜晚就做純素套餐,需提前一日Book枱,話俾店主知用餐時間同人數。晚餐以Omakase方式供餐,去到上菜一刻先知有咩食,充滿驚喜。

 

聽住店主特選嘅黑膠唱片音樂,返璞歸真咁用番木製餐具。食餐飯嘅時間就可以遠離繁囂,忘記凡塵嘅俗事。今個禮拜唔好再去自助餐搏命喇,不如試吓放過自己,身心一齊擺低幾両啦!

 

 

無菜單素食套餐(MOP78至188)

價格視乎當日嘅食材同菜式而定,呢度係MOP78嘅一人餐。越多人食,就可以召喚出越多不同菜式。全餐用料天然,謝絕加工假肉。需一天前預約。

 

 

糙米飯

備受健康人士推崇嘅好物。口感煙韌,纖維豐富,而且比白米更頂肚,全餐冇肉都唔怕餓親。

 

 

蔬菜咖喱

是日一人餐主菜。日式風格甜咖喱幾乎唔辣,每啖都充滿蔬菜嘅甘甜。內有入晒味嘅紅蘿蔔、薯仔、菇粒等,非常充實。

 

 

午餐餐湯-冬蔭公湯

 

 

烤菜手工貝果包(MOP48,跟餐湯)

Bagel烘到又熱又香脆,質地煙韌,齋啪都開心。裡面夾有色彩繽紛嘅烤蔬菜:脆瓜同彩椒爽脆鮮甜,而茄瓜嘅質感就帶俾人一種食緊肉片嘅錯覺,加埋墊底嘅芝士吊吓味,就算素食都唔覺空虛。

 

 

栗子南瓜湯

呢個例湯意想不到咁正!栗子帶有醇厚香氣,加埋南瓜之後,係濃郁得嚟又勁甘甜,精彩程度比肉湯有過之而無不及。

 

 

三品料理配糙米飯(MOP68,跟咖啡)

午市「三寶飯」日日新款。今日有特製嘅蔬菜扒、炒雜菇&涼拌木耳西蘭花。

 

 

燕麥蔬菜扒

睇落似煎魚餅,原來入面一粒肉都冇。混合多款蔬菜同香料,再加入燕麥,一齊打碎後製成。食落係軟淋之中又夾帶住粒粒蔬菜嘅爽口。而明明只係區區一塊菜餅,偏偏充滿孜然香氣,犯規級惹味,好送得飯。

 

 

朱古力蛋糕卷(MOP35)

內含果仁嘅黑朱古力脆皮苦中帶甘,蛋糕質地鬆軟,甜度輕怡。配合新鮮草莓夾心,為濃郁朱古力帶來一絲酸爽清新。

 

 

八分目
地址:水坑尾巷12號A
電話:6677 8669

豪食蠔扒
春天限定甜點

現職電腦科技相關行業,總是一個人在練習一個人食飯。寂寞時唯有憑著寫食記來讓網友們陪我撐枱腳。部落格「1 Man Dinner」:1mandinner.blogspot.com

Facebook