Home專欄職場食好西飽覽澳門海景 嘆盡隱世中菜

飽覽澳門海景 嘆盡隱世中菜

「新馬路遊客眾多」,巴士廣播都有講啦,新馬路一帶的而且確係佈滿空間有限嘅遊客店,稍有質素嘅餐廳亦根本唔輪到你入座,想喺呢個咁繁忙嘅區域,搵一個環境冇咁密集嘅地方安享美食?

 

 

位於澳門十六浦索菲特酒店18樓頂層嘅「樂軒華粵菜餐廳」一定係不二之選,呢度除咗個環境夠大氣夠開揚,仲送多個全澳獨家嘅內港湖畔景,不過講到尾環境都係次要,最緊張梗係食落肚嗰part,有經驗值爆燈嘅新加坡星級總廚莫志華坐陣,無論係粵菜定點心都咁靠得住,今次就為大家盤點出最受食客歡迎嘅幾款菜式;為未曾踏足過樂軒華嘅朋友嚟個preview先啦!

 

 

 

紅燒鮮鮑佛跳牆

一直對佛跳牆抱住一個「可遠觀而不可享用」嘅態度,又鮑魚又海參又瑤柱咁,入場門檻應該會好高,殊不知喺呢度放低兩舊幾水就可以一嚐皇帝御膳嘅滋味,足火喉又足料,清晒佢已經飽咗一大半。

 

 

香辣啤酒鴨

啊媽教落鴨肉清熱滋補得嚟又去到水腫,而家加埋有鬼佬涼茶美譽嘅啤酒一齊拍住上,仲唔係咩熱氣都驅走晒咩?個鴨肉入口酥鬆,咬落唔會又乾又柴,入口更有少少啤酒嘅餘韻,甘甘哋帶幾分鮮香,夏天食就啱晒喇。

 

 

麻婆豆腐扒扇貝

相信大家對麻婆豆腐呢款四川名菜都唔會陌生,咁麻婆豆腐加扇貝呢個咁前衛嘅配搭,大家應該未試過喇掛?扇貝柔韌彈牙,同豆腐嫩滑嘅口感形成對比,而麻婆豆腐應該俱備嘅麻、辣、鮮、燙、嫩都完全做到,正宗到差啲以為自己置身喺四川境內。

 

 

牛油奶香麥片蝦

行政總廚莫志華來自新加坡,對家鄉菜式一早就駕輕就熟,金黃酥香嘅燕麥黐滿蝦嘅外殼,裡裡外外都咁惹味,為咗答謝佢將正宗嘅星洲名物麥皮蝦帶到嚟樂軒華,食客唔止連蝦殼都清埋,手指頭亦啜得一乾二淨。

 

 

鮑汁扣花菇海參

飽滿嘅花菇同海參浸喺甘香無比嘅鮑汁到,呢個畫面完全係令人口水直流,肉質肥厚掛晒汁嘅刺參,經浸、泡、燜、焗等多重關卡先有資格上碟,食落彈糯爽口,啖啖都充滿膠原蛋白歷練。

 

 

濃湯雜菌扒娃娃菜

有賴個甘醇濃郁嘅高湯,將娃娃菜嘅鮮甜無限放大,經處理過嘅雜菌鹹香惹味,有錦上添花嘅效果,又一次體驗到將家常材料化成一道非凡菜式嘅張力!

 

 

精彩嘅唔止晚市嘅菜式,午市時段供應嘅點心亦都深受食客歡迎,其中明蝦蟹子燒賣、蘆筍鮮蝦餃、遼參青芥菜苗餃同焦糖一口包等,都長居最受歡迎點心嘅榜首之位。呢排為咗回饋食客對點心嘅瘋狂擁戴,星期一至五,所有點心齊齊做優惠每款$29,喺星級酒店內面向靚景嘆點心,個價錢都可以好貼地嘅!

 

 

擁有30年的餐飲管理經驗及美食烹飪經驗,曾服務於亞洲及澳門等地的多家國際五星級酒店,擅長於中餐及其他亞洲菜系的料理與創作。融合澳門獨具一格的飲食文化,莫大廚致力為食客們帶來推陳出新的美食驚喜。

 

 

 

 

樂軒華粵菜餐廳
地址:澳門十六浦索菲特酒店18樓

電話:+853 8861 1001
點心供應時段:
每天早上9時至下午3時
晚飯時段:
下午5時半至10時

春天限定甜點
Facebook