Home專欄職場講呢啲公司電腦公器私用指南

公司電腦公器私用指南

返Office嘅打工仔,日日對住枱頭部電腦做嘢,做到悶悶地,難免隻手指會唔受控制,好自然咁去咗click第二啲嘢。你可能喺打開咗個電腦版whatsapp、又或者打開咗個接龍遊戲、又或者唔小心click開咗個browser上網。不過大家唔好唔記得,呢部係公司電腦,使用記錄可能已經一一收錄喺IT部個harddisk入面,其實Your boss is watching you!

 

1.請小心上網

雖然網絡世界咁浩瀚,但我地通常上嚟上去可能都係嗰幾個網站。一打開上網個browser,就好自然會去自己成日睇開嗰啲網頁。可能係facebook、可能係新聞網站、可能係搵工網,不過呢啲都唔驚,最驚係你唔小心開咗個網站睇波多野結衣。

雖然我未聽過有人因為睇咸網而畀人出warning,不過就聽過有人因為朝早唔小心開咗個財經網,全日唔記得關之下,第日畀老細捉咗入房問話。老細真係咩都知,特別係小氣嗰啲。

 

2.使用時眼觀四面

行路要睇路,用電腦都一樣要。喺你睇緊呀Fred同何雁詩最新嘅劇情發展時,有個黑影原來就企咗喺你後面,金晴火眼咁望實你。呢個通常都係最鍾意打小報告嘅Reporter,你幾時幾分幾秒睇緊邊單新聞都畀佢記錄在案,隨時報告畀老細知。

如果你東南西北方都有個目必斜視嘅屎忽鬼,為咗一家大細嘅平安,唔該自己睇路,以免隨時被暗算而死。

 

3. Software咪亂裝

公司電腦唔同屋企嗰部,唔係你想裝咩就裝咩。有啲人返工冇嘢做,無聊就梗係要搵啲嘢玩吓。如果平時返工都可以打到隻online game,一定可以比人升快幾個Lv。除咗升Lv,仲可以增加埋迴避老細目光嘅刺激感,一game兩玩,激上加激諗起都爽。

不過,唔好以為你裝咗啲咩落部電腦度就冇人知,部電腦連住公司network,IT部呀明一按個制就知你部機有啲乜。就算你冇當場斷正,一睇電腦record就知你玩緊邊隻online game。

 

4. 記得做電郵Housekeeping 

好多打工仔做到悶悶地就會Email當Whatsapp,send畀隔離再隔離位個friend子吹下水。呀J同呀K一向friend底,日日都會喺Email吹下水,吹嘅內容離不開都係呀Mary頭先喺廁所pk、大隻Ken又唔換水、老細今日又西面、老細今日件衫好鬼柒之類嘅是是非非。傾完之後,大家都冇諗過即刻delete咗啲無謂Email。結果終於有一日,呀J決定辭職,但到走嗰日都冇諗過要清下個mailbox。因為驚仲有客仔send email嚟,呀J個電郵信箱會保留一個月,但控制權就交咗畀邪惡嘅老細。

哼哼⋯老細一走去睇,未走嘅呀K下場有幾恐怖,大家可以自己想像。如果你都有咁嘅習慣,記得要做housekeeping!

HR小薯蓉facebook page blogger,做左HR十年多,由薯仔做到變薯蓉。HR係咪高高在上?又廢又冇野做?查實我地幾分傷心幾分痴,成日OT冇人知。從small potato嘅角度些牙下做HR同埋打工仔既辛酸。 2016年開設個人網誌:http://www.mashedpatata.com,2017年5月推出《我係邪惡HR》一書,貼地分享HR世界。

Facebook