Home專欄職場講呢啲入到老細房識睇一定係睇呢啲

入到老細房識睇一定係睇呢啲

轉工轉到新環境,新嚟新豬肉,好易任人魚肉。打聽新老細嘅情報,係打工仔去到新環境嘅Number 1要務。除咗靠身邊嘅同事,仲要靠自己嘅觀察。當你第一次入到新老細間房,第一樣要留意嘅嘢一定係佢啲相。首先要觀察下四周有冇類似相架嘅物體,或者枱頭有冇貼咗啲即影即有相。如果有嘅話就恭喜你先,證明佢個人除咗工作之外仲有啲牽掛,「可能」唔會捽得你咁盡,不過唔好咁開心住,只係「可能」,喺FF之前要睇清楚啲先。

 

1. 家庭相


令人最興奮嘅應該就係見到一家大細嘅家庭照,返工都要望住屋企人嘅相,證明老細係一個會記掛屋企嘅人,除咗返工之外都仲會重視家庭生活。可能佢收工都會趕住返屋企煮飯/食飯,咁就唔會有「早過老細收工」嘅壓力。不過,當然亦都有可能係佢日日做到天昏地暗,要靠睇住啲相嚟掛住屋企。

 

2. 細路仔相


出現大量細路仔相都係一個唔錯嘅徵兆,有小朋友自然想多啲對住佢地,除咗努力工作之外仲要抽多啲時間陪佢地玩。佢一定唔會晚晚留喺度OT,亦都明白照顧家庭嘅重要。不過,有樣嘢你一定要攪清楚,就係個小朋友係咪佢嘅。我聽過有一位朋友見到新老細房有大量嘅小朋友相,心諗老細有小朋友應該會留多啲時間畀屋企。點知個老細原來日日做到夜深,星期六、日又返工,攪到同事好鬼大壓力。後嚟先喺同事口中得知,個細路原來係佢侄仔,唔駛佢照顧,而老細原來一直係單身⋯⋯

 

 

3. 情侶相


知道老細未結婚都唔緊要,至少要打聽下佢嘅感情狀況。我諗好多打工仔都好怕老細冇著落,結果將時間全部貢獻晒畀公司,你收咗工佢都繼續send email畀叫你做嘢。如果見到間房有一兩張同男/女朋友嘅合照,至少情人節佢都未必會捽得你咁盡。

 

4. 動物相


冇小朋友唔緊要,鍾意小動物嘅老細都應該有返啲愛心。無論佢房入面啲相係佢隻貓仔、狗仔、龜仔、兔仔、蛇仔、雀仔、魚仔、蜥蜴仔定小強,佢都叫做有啲牽掛,仲可能會好似愛護小動物咁愛護你。

 

 

5. 旅行相


當你入到老細房,見到一張張世界各地嘅照片,包括非洲大草原、冰島北極光、南極嘅企鵝、愛斯基摩人、阿爾卑斯山山脈、世界杯決賽,所有相入面都有你老細個嘜頭,證明你老細係一個Work hard、play hard嘅人。佢明白去旅行係人生嘅必需品,你放假走多兩轉韓國都唔會畀面色你睇。不過話畀work hard、play hard,唔好唔記得work hard嗰部分,辛苦完先有得去玩喎。

HR小薯蓉facebook page blogger,做左HR十年多,由薯仔做到變薯蓉。HR係咪高高在上?又廢又冇野做?查實我地幾分傷心幾分痴,成日OT冇人知。從small potato嘅角度些牙下做HR同埋打工仔既辛酸。 2016年開設個人網誌:http://www.mashedpatata.com,2017年5月推出《我係邪惡HR》一書,貼地分享HR世界。

Facebook