Home專欄職場食好西文藝Bar中 歎癲拿

文藝Bar中 歎癲拿

唔知大家有冇聽講過有間酒吧叫「些些」?酒吧位於鏡湖附近,相傳好多藝術人都鍾意喺度打躉。當年如果唔係我個Band友上司帶我過嚟威,以我呢挺淨係識用小畫家同美圖秀秀嘅凡人嚟講,應該永世都唔會知有呢間嘢嘅存在。

 

從朋友口中得知呢度最近轉手轉型,而家除咗繼續有得幫襯美酒,仲有美食供應。主打高質大樽裝手工啤酒,各式精選紅酒、白酒、甚至日本清酒梅酒都可以喺度搵到。而店主本身係咖啡師,滴酒不沾嘅乖仔乖女嚟到,就可以整番杯手沖咖啡,唔駛再飲汽水橙汁咁悶局喇。

 

 

至於餐點,就梗係唔係求其開包魚皮花生啦!呢度有精緻嘅西式佐酒小食,仲可以預約Mop188嘅3-course Dinner。晚餐同酒一樣,事前完全唔知有咩食,由店主揸晒Fit,坐低等食就得。雖然廚房係豆腐潤格局,但出品一啲都唔HEA,食材配搭有心思。由煮飯到配酒送餐,都係店主一條友搞掂晒,成件事就好似去Friend屋企食飯咁輕鬆。

 

咁多嘢飲,咁咪有排揀?事實係我嚟幫襯過好幾次,一次都冇用過個腦。事關每次過到嚟都係OT之後,啲腦汁已經乾晒塘,淨係識得攤喺度繑埋雙手,等店主發辦,介紹吓有咩Off-Menu得意嘢。如果你飲「我的最愛」飲到悶悶地,都不妨試吓嚟呢度開啟新世界。呢度酒類款式多,精品得嚟又唔怕超貴,加埋店主沿途聲音導航,確保各位新手可以得到美滿嘅第一次。講真,我每次嚟到呢度都有少少驚,怕一個唔小心,又識多個新歡要我供養。

 

 

 

750ml手工啤酒(Mop170-230)


如果過嚟啤一啤,就會發現呢度啲手工啤零舍大碌。咁大樽啤除咗方便開心Share之外,同330ml嘅細樽啤又有咩分別?原來唔少高質手工啤廠都只出大樽裝,根本冇細樽版;另外,大樽啤酒亦可以做「Bottle Conditioning(瓶中熟成)」,啤酒口感更順滑。

 

店舖內提供各款手工啤,可以當精品擺設之餘,重有好多酒類款式俾大家選擇!

 

 

 

蕃茄水牛芝士&鹽烤新薯(Mop188套餐內)

前菜有溫柔與硬朗嘅組合:烤新薯外層焦脆,鹹味並唔係流於表面,而係滲到入薯仔嘅深處;水牛芝士質地軟潤,同蕃茄組成冇得輸嘅經典配搭,面頭加咗少少亞麻籽同藜麥,增加口感。

鹽烤新薯

 

 

 

 

風乾火腿配無花果(Mop55)

18個月巴馬火腿以及風乾豬頸肉,加上甜絲絲嘅新鮮無花果,一鹹一甜夠晒衝擊性?未算,要配埋杯手沖咖啡,火腿殘留在口腔內嘅鹹香可以將咖啡嘅甘味吊晒出嚟。

 

 

 

手沖咖啡(Mop55)

飲啡要用酒杯!皆因有機會品嚐靚豆沖出嚟嘅靚啡,就要連色澤同香味都欣賞埋。配少少鹹食,味道轉變之後咖啡會顯得更甘甜。

 

 

 

紅蝦鷹嘴豆蕃茄意粉(Mop188套餐內)

紅蝦嘅戲份由前菜帶到主菜,而主菜嘅醬汁同樣標青:蕃茄醬用 高壓鍋嚟煮,直到焦糖化,食落蕃茄味濃郁,甜味更突出。

意粉係完美Al Dente,煙韌彈牙。好多大餐廳嘅出品都冇咁好口感!

 

 

 

紅酒紅蝦汁配日本豆腐(Mop188套餐內)

睇落好簡約,但原來汁底好有驚喜!紅酒酸味吊出紅蝦嘅鮮甜,溫軟清淡嘅豆腐就變成將醬汁送入口嘅載體。紅蝦鮮味聯合酒香豆香,在舌上慢慢化開。

 

 

Che Che Cafe
新勝街70A R/C
6288 0857

現職電腦科技相關行業,總是一個人在練習一個人食飯。寂寞時唯有憑著寫食記來讓網友們陪我撐枱腳。部落格「1 Man Dinner」:1mandinner.blogspot.com

Facebook