Home專欄職場講呢啲5種腦細令下屬洩氣嘅行為

5種腦細令下屬洩氣嘅行為

1. 凡事特別處理


一間有返咁上下規模嘅公司,都應該有既定嘅程序同守則。每次打工仔都跟返公司規矩做嘢,但當一有人投訴,腦細就次次都話可以特事特辦,簽完個名就話:「呢個case好特別,所以要特別處理,你要識變通先得。」

真係好想問腦細,啲公司policy到底定嚟做乜嘅呢?講到尾,其實你就是policy吧。打工仔清醒吧!你係永遠都猜測唔到主子嘅心意的,快啲返出去做嘢啦。

 

 

 

2. 功勞略奪戰


「有福同享,有難同當!」武俠小說入面講嘅義氣,今時今日喺扮公室入面已經買少見少。腦細去隔離部門social時,下下都同人講:「得!冇問題!我幫你死掂佢!」

留意返,「我幫你死掂佢」個「我」字其實係講緊下面班細嘅。接咗單嘢返嚟同啲細嘅講:「今晚一定要死掂佢,聽朝擺喺我枱面。」
班細嘅唯有開OT幫腦細死掂佢,第二朝腦細就拎住份嘢去隔離領功:「嗱!我都話幫你攪掂佢!」
留意返,今次呢個「我」字係指佢自己。功勞腦細拎曬,繼續坐升降機步步高陞。班做細嘅,部升降機唔跌落去已經要謝主隆恩。清醒啦!咁樣值得咩?

 

 

 

3. 擦鞋神功


有一種腦細嘅生存絕技係向上擦向下擦,到處博命胡亂擦。見到大老細出現,就會從房內秒速衝出嚟打招呼,快過孫悟空嘅瞬間轉移。

「腦細早晨,我尋日買咗你最鍾意食嘅可愛熊仔糖,已經放咗喺你枱面喇。」

如果佢平時做嘢有擦老細鞋一半咁賣力,佢應該好打得,一個打十個冇難道。上位靠擦鞋神功,下屬見到望住咁樣嘅上司,唔好話洩氣,要尊重佢都有難道。

 

 

 

4. 今日的我打倒昨日的我


「嚟啦!睇住我嘅必殺技啦!——今日的我,打倒昨日的我!」

就好似細個睇超人咁,每次唔到最後一刻,超人都唔會出必殺技,但係當佢一出,你就知道怪獸就要被K.O.,故事就要完結。喺扮公室入面,當腦細出到呢招必殺技,你呢隻怪獸就喺時候要收皮。

「明明尋日你先叫我約呀陳生十點上嚟,今日又問我做咩約咁早。」

真係好想坐多啦A夢架時光機返去昨日,搵返尋日嘅你出嚟打倒返今日嘅你呀。

 

 

 

5. 付出幾多都冇回報


「公司冇budget,你等下啦,我都冇辦法。」
「又等?上次升職又唔加人工,今次又冇?」
「公司生意唔好嘛。」
「唔係喎,公司明明賺好多。」
「但都meet唔到target呀。」
「3年又3年,你叫我點等?」

當無論你點用心工作,點樣畀心機,每年年尾都淨係換嚟呢個說話,真係得返兩行眼淚。每個人付出咗努力都希望有回報,三年又三年之後係時候要清醒,含淚告別腦細,重新上路啦。

HR小薯蓉Blog: http://www.mashedpatata.com

HR小薯蓉facebook page blogger,做左HR十年多,由薯仔做到變薯蓉。HR係咪高高在上?又廢又冇野做?查實我地幾分傷心幾分痴,成日OT冇人知。從small potato嘅角度些牙下做HR同埋打工仔既辛酸。 2016年開設個人網誌:http://www.mashedpatata.com,2017年5月推出《我係邪惡HR》一書,貼地分享HR世界。

Facebook