Home專欄職場講呢啲《29+1》的人生哲學

《29+1》的人生哲學

《29+1》,一聽個名就知道係講女人最擔心嘅30歲關口。作為一個男人,對於呢類題材嘅電影本身就冇乜興趣,而且同期仲有《異形》、《魔盜王》上畫,有得楝梗係楝呢啲啦。之不過有時你真係未必有得揀,入到戲院先發現,原來都有唔少男人入場睇,可能十個有九個都係同我一樣,係陪身邊嗰個入嚟睇。不過經過喺戲院入面嘅110分鐘,你就會明白,無論係男人定女人,只要你係一個每日營營役役於職場打拼嘅人,你都可能會有一番體會。

 

(劇透注意!而家返轉頭仲嚟得切!)

 

 

《29+1》原本係一套2005年嘅舞台劇,喺彭秀慧自篇自導自演嘅作品,當年叫好又叫座,幾度公演亦場場爆滿,今次電影版亦由佢執導,將《29+1》搬上大銀幕。故事中嘅兩位主角林君若(周秀娜飾)同黃天樂(鄭欣宜飾)性格截然不同,林若君係一位事業女性,喺社會上每日朝九晚十,一早起身唔想返工,返到公司又忙到冇得收工。黃天樂則樂天知命,十年都做住自己喜歡嘅工作,雖然收入唔高又冇乜前途,但係因為性格比較樂天,覺得生活開開心心就已經足夠。

 

林若君即將踏入29+1嘅人生,升職令佢壓力大增,及後爸爸突然離世,佢先發現自己冇珍惜身邊嘅人、做緊嘅並唔係佢想要嘅,所以毅然決定辭職。禍不單行嘅係,佢同時發現男友原來早已出軌,令佢情緒完全崩潰。機緣巧合之下,佢因為包租公賣樓,喺包租公介紹之下,搬咗去短暫出門嘅黃天樂屋企暫住。黃天樂性格樂天,過住同林若君截然不同嘅快樂人生,雖然臨近30歲發現自己身患重病,但佢仍然樂觀面對,勇敢追尋自己嘅夢想。林若君透過留在屋裡嘅日記認識到同樣即將30歲嘅黃天樂,令佢對自己人生有另一番體會。

 

 

電影雖然題為《29+1》,但探討嘅並唔係單純女人30歲關口嘅問題。我地不論男女,大部分人都好似林若君一樣,營營役役咁喺職場過住忙碌嘅生活,而黃天樂只係我地想要又不敢追求嘅理想。我特別鍾意電影入面其中一幕,娜姐飾演嘅林若君同其他打工仔一樣,著住一身老西搭地鐵、坐電梯趕返工。娜姐突然望一望身邊嘅人然後嚇咗一嚇,好似忽然間醒一醒,發現自己不經不覺間已經變成人群一部分,失去了靈魂。

 

 

故事設定喺2005年嘅香港,當年樓市仍未狂升,今時今日生活比以前更艱難,要真正擁抱自己嘅人生亦比12年前嚟得更唔容易。有幾多人今日能夠如林若君一樣,願意放低高薪厚職,擁抱黃天樂嘅開心哲學?我地每日為咗更幸福快樂嘅生活而喺職場併博,但拼博嘅過程往往卻犧牲咗快樂,咁我地到底係為咗啲咩而繼續而家嘅生活?因為被世界迫著向前走,我地已經唔會去諗自己份工係咪適合自己,不知不覺,原來我地已經唔記得自己其實想要啲咩。

 

HR小薯蓉Blog: http://www.mashedpatata.com

HR小薯蓉facebook page blogger,做左HR十年多,由薯仔做到變薯蓉。HR係咪高高在上?又廢又冇野做?查實我地幾分傷心幾分痴,成日OT冇人知。從small potato嘅角度些牙下做HR同埋打工仔既辛酸。 2016年開設個人網誌:http://www.mashedpatata.com,2017年5月推出《我係邪惡HR》一書,貼地分享HR世界。

Facebook