Home專欄職場講呢啲你係「不能」 定「不懂」收工的員工?

你係「不能」 定「不懂」收工的員工?

準時收工係大部分打工仔每日嘅人生目標,不過呢個人生目標對好多人嚟講都係一種幻想。

打工仔日復日、年復年咁OT,做做下都已經唔知自己係多嘢做到收唔到工,定係做到唔識收工。睇吓下面列出嘅徵狀,check吓自己係邊種員工。

 

「不能」收工的員工徵狀:

徵狀1:試過唔OT畀人歧視

正所謂有頭髮邊個想OT,當大家都多嘢做,留喺公司OT嘅時候,你拎起個袋想走?即刻有幾對憤怒嘅眼神朝你射過嚟。第二日返工嘅時候就聽到啲冷言冷語:「唉!尋晚OT到10點搭的士返屋企,邊似啲人7點收工咁舒服。」聽到之後心裡會覺得少少嬲,但又有少少內疚,結果嗰晚都OT到10點坐的士返屋企。

徵狀2:壓力大唔想返

因為工作量太大,晚晚做到唔知幾點收工,久而久之覺得壓力極大。返到屋企晚晚冇覺好瞓,仲成日發惡夢夢見做緊公司嘢。第二朝起身第一件事係想請病假⋯⋯但又唔敢請,因為想留返啲quota去見工。

徵狀3:掛住呀媽啲飯

過咗6點鐘,肚仔難免開始餓,到咗7點零8點就係晚飯嘅時間。OT都係為咗爭取多啲時間做嘢,呢個時候梗係叫外賣啦。但當拎起盒飯嘅時候就好想喊,因為好想食到呀媽煮嘅飯。

徵狀4:假期饑渴症

每到咗星期一,就好想第二日係星期五。心諗如果可以skip咗中間嗰幾日,折壽都肯。覺得星期六日係每個星期嘅救命草,一請到假就要去旅行,可以離開公司有幾遠就走幾遠。

 

「不懂」收工的員工徵狀:

徵狀1:試過OT畀人讚

人類同小動物一樣,當一個行為經常被讚賞,就會認為呢個行為係好行為,於是會一次又一次重複咁做。有啲打工仔可能因為付出好多OT嘅時間,換到老細嘅稱讚,甚至係升職加人工,不知不覺就覺得OT係得到回報嘅成功之道。

徵狀2:單戀公司

因為經常留喺公司,公司就好似自己屋企一樣,自己個位佈滿自己最心愛嘅物品,行街買嘢都係諗住擺係公司張枱。同不能收工的員工一樣,OT完夜晚返屋企都會發惡夢,不過發嘅惡夢係有一日退休,被迫離開公司嘅慘況。原來不知不覺間,發現自己已經有少少愛上咗公司。

徵狀3:掛住公司樓下茶餐廳

6點之後最期待嘅就係晚餐時間,鍾意落樓下茶餐廳坐低慢慢嘆返個福建炒飯,多過叫外賣上嚟公司食。覺得休息係為了OT多幾個鐘,舒舒服服食完先可以惡戰到凌晨兩點。最極端嘅情況係甚至試過喺公司食埋宵夜做通頂,第二日著住尋日套衫同同事講早晨。

徵狀4:諗緊假期好唔好返公司

其他打工仔返二想放假,但你就放假想返工。食完個早餐之後,返到公司打開電腦做嘢有一種輕鬆愉快嘅感覺,因為今日再冇其他人走過嚟騷擾你做嘢。返工成為假期必然嘅節目,就算請咗Annual Leave,至少都有半日返咗公司做嘢。

 

HR小薯蓉Blog: http://www.mashedpatata.com

HR小薯蓉facebook page blogger,做左HR十年多,由薯仔做到變薯蓉。HR係咪高高在上?又廢又冇野做?查實我地幾分傷心幾分痴,成日OT冇人知。從small potato嘅角度些牙下做HR同埋打工仔既辛酸。 2016年開設個人網誌:http://www.mashedpatata.com,2017年5月推出《我係邪惡HR》一書,貼地分享HR世界。

Facebook