Home專欄職場講呢啲公司距離的副作用

公司距離的副作用

最近聽到身邊嘅朋友轉咗新工,返工時間只需要15分鐘,朝早起身之後仲可去茶記嘆返個靚早餐,薯蓉我表示十分葡萄。佢之前每朝返工都趕頭趕命,返到公司樓下先可以買個包,喺office一路做一路咬,而家?直頭係風流快活呀!

記得早陣子有人喺討論區公審一位90後,佢因為返工來回要三個鐘而辭職,佢話唔想將人生咁多時間枉廢喺交通上面,結果就畀人話佢唔捱得。其實每日要花費3個鐘坐車,飛機都飛咗兩轉台灣。我相信如果一般打工仔每朝早起身返工係需要十級勇氣,咁返工來回要坐車超過三個鐘嘅打工仔絕對稱得上係勇者。當你每朝返工都想唱一句:「你我相隔多麼遠~」咁返工嘅距離對你嚟講可能影響深遠。

 

 

1.冇精神做嘢

坐長途車,好彩嘅話有位坐都可以補眠一下,但冇位坐企足個幾鐘你都咪話唔攞命,未返到工都已經冇咗半行血。放工當其他同事返到屋企食飯,你仲喺漫長旅途中。到你返屋企食完飯,處理下自己嘅事務,望下個鐘已經12點鐘。但其他同事呢個時候已經可以上床熟睡,第二朝你又要早啲起身坐車返工,平均每日比人休息少幾粒鐘。休息少咗,精神又差咗,工作表現難免受影響。

 

 

2.容易遲到

需要坐長途車返工,特別係冇位坐嘅朋友,就會明白塞車係幾咁痛苦嘅事。就算你已經提早出門口,塞一塞車就可以令你前功盡廢。如果公司對遲到比較嚴謹,食warning都可能隨時食到被炒。結果係要預早再預早出門口,休息時間又被壓縮,形成惡性循環,公平咩?

 

 

3.人工都加得慢啲

容易遲到、休息時間又唔夠,工作表現隨時都可能出現問題。一個唔覺意真係因為休息唔夠爆咗隻鑊,年尾份bonus就係咁先。表現唔好,人工又會加得少,滿足感又降低,可能對自己事業有好大影響。

 

 

4.同家人相處時間減少

因為返工距離遠,你幾耐冇同屋企人齊齊整整坐埋一齊食飯?平時返到屋企可能已經8、9點,又唔好意思要屋企人等你食飯,結果晚晚都係自己食。食飯係一家人相處嘅好時光,如果一星期都難同屋企人同枱食飯,後悔嘅時候就可能太遲。

 

 

5.冇時間做自己喜歡的事

每個人都有嗜好,有人鍾意做運動、有人鍾意打機、有人鍾意睇書、有人鍾意煲劇。辛苦咗成日,放工想做下自己喜歡嘅事都係好合理。但如果OT完,仲要加多個幾鐘頭車程,食完飯沖完涼都已經到咗瞓覺嘅時間。呢個時候諗,如果畀返坐車嗰個幾鐘你,你話幾好呢?

 

 

6.影響身心健康

工作時間長,返工放工舟居勞頓,休息時間自然大減。有時OT得夜,返到屋企夜一夜先食飯,食無定時,影響消化系統嘅健康。最慘係冇時間做運動,眾所周知,運動可以減壓,缺乏運動除咗影響身體健康,亦令壓力無法舒緩,對心理健康都有影響㗎。

 

以上講嘅你可能覺得有啲誇張,但交通時間過長,唔多唔少對各方面都有影響。所以公司距離,都係一個考慮轉唔轉工嘅重要因素。

 

 

HR小薯蓉Blog: http://www.mashedpatata.com

 

 

 

HR小薯蓉facebook page blogger,做左HR十年多,由薯仔做到變薯蓉。HR係咪高高在上?又廢又冇野做?查實我地幾分傷心幾分痴,成日OT冇人知。從small potato嘅角度些牙下做HR同埋打工仔既辛酸。 2016年開設個人網誌:http://www.mashedpatata.com,2017年5月推出《我係邪惡HR》一書,貼地分享HR世界。

Facebook