Home專欄職場講呢啲假日絕對有比返工更有意義的事

假日絕對有比返工更有意義的事

而家智能手機發達,收公司E-mail極方便,老細一番好意咁話幫你裝個公司E-mail account喺你手機,你都冇理由拒絕佢啦係咪?不過一裝左就返唔到轉頭,收工、放假、星期六、日都聽到個電話係咁叫,叫到Siri都想叫唔好。

 

呢個星期日,我如常咁喺麥記享受緊我嘅星期日早晨全餐,呢個時候突然聽到電話個E-mail連續叫咗幾聲,心諗邊個星期日都咁勤力send E-mail,不過我都一於少理,堅持繼續食早餐。

隔咗一陣,電話又繼續嚮,又係幾下E-mail嘅叫聲。我地做HR呢行,除非同外國公司有緊急事情要處理,一般都唔需要星期日急住check E-mail。

 

 

嘆完個靚早餐,食埋塊薯餅,望住電話嗰幾個E-mail嘅通知,心諗不如睇下有咩咁urgent要即刻send。一打開個電郵,原來出呢幾個E-mail嘅係我隔離部門嘅同事O小姐。我見到呢幾個E-mail係佢出,就一啲都唔覺得奇怪。

據我所知,佢由畢業開始已經喺薯仔公司做,做到今日已經有十幾個年頭。咁多年嚟,佢都有一個習慣,就係放假都會返公司做嘢,風雨不改。無論公司已經推行5天工作週、工作量嘅多寡,佢依然堅守信念,星期六、日都會搵一日返公司做嘢,好似唔返唔舒服咁。

 

 

毫無疑問,對公司嚟講,請到一個肯為公司付出咁多嘅員工,真係乜都抵返曬。我都明白當一個人愛自己嘅工作,係可以做到天昏地暗,先不論佢有幾愛份工,但人一個星期已經有基本四十幾個鐘畀咗公司,扣除瞓覺、搭車嘅時間,剩返一半都冇。難道除咗工作,放假真係冇更有意義嘅事情要做?

 

 

如果你一星期有兩個休息日,你絕對可以做更多有意義嘅事情。有意義未必指去做義工幫人,對自己、對身邊嘅人好一樣係好有意義。空閒嘅時間可以做下運動,令自己頭腦更清醒,工作起嚟更靈活。朝早陪家人食個早晨全餐,然後一齊去行街睇戲,一樣係有意義嘅事情。甚至係培養自己嘅興趣,睇下書學習下新知識對人生亦更有幫助。

 

人生多姿多彩,錢當然要搵,工一定要返,但人生不止工作,仍有好多有意義嘅嘢等住你去做。到一日醒來,年華老去,已錯失值得珍惜嘅時間同重要嘅人,到時後悔可能已經太遲。

講返收到嗰幾個E-mail,原來只係幾個meeting reminders。我心諗,有必要星期日一早返公司send嗎?

 

 

HR小薯蓉Blog: http://www.mashedpatata.com

HR小薯蓉facebook page blogger,做左HR十年多,由薯仔做到變薯蓉。HR係咪高高在上?又廢又冇野做?查實我地幾分傷心幾分痴,成日OT冇人知。從small potato嘅角度些牙下做HR同埋打工仔既辛酸。 2016年開設個人網誌:http://www.mashedpatata.com,2017年5月推出《我係邪惡HR》一書,貼地分享HR世界。

Facebook