Home職場趣聞咩都唔識,註定一世比人老點!

咩都唔識,註定一世比人老點!

好多人覺得「周身刀冇張利」係一個貶詞,但做物業管理呢個行業,的確需要樣樣都識啲,好似工程五花八門,會所設施日新月異,園藝既花草樹木,仲有清潔雲石既保養方法,真係經驗少啲都搞唔掂。

幾年前,公司有個屋苑係出名既爛盤,基本上新請返黎既經理冇人可以做多過一年,住客日日鬧,同事就不斷咁辭職,惡性循環底下,管理公司就俾住客針對瘋狂投訴,為撥亂反正,公司就委派我去嗰度當救亡工作。

我既年代,物業經理有兩種,一種係讀書成績好好,畢業就入公司做MT重點培訓,入職就已經係主任級;另一種係成績唔好,但紅褲子出身再慢慢進修,一步步晉升成為管理層。

接手屋苑冇耐,理解現時同事同上一個經理既處事手法之後,我發現到個問題,就係屋苑裡面發生事故既話,同事既處理方法就係搵保養商跟進,而同事自己咩都唔知。

你問佢地

壞乜,唔知;

點解壞,唔知;

點處理,唔知。

有一次,同事話淡水泵出現問題,保養商話要大修跟進,我落去睇左兩眼,發現其實係止回閥既問題,更換便成;又一次,大堂地下雲石因欠缺保養而出現污積,承辦商話要磨走石面再重新拋光,而我睇過其實用洗石水再用大小碟重覆清潔拋光便成;再有一次,承辦商話某座頭既通訊器出現問題,要更換線路版,而最後發現竟然係唔記得駁電。

我知道一個人唔能夠做晒所有事,更冇可能無時無刻都睇住每一項工程,但我好細個已經明白一個道理「咩都唔識,註定一世俾人老點」,「咩都唔睇,註定一世做盲頭蒼蠅」,特別係當自己晉升為管理層,同事睇你頭做野,如果自己冇料既話,根本就唔會有人服自己。

之後,我教我身邊既同事,保養商講既說話唔可以盡信,住客覺得管理公司廢,係因為我地連自己工作既程序同內容都唔知,自己冇料,仲叫人點信你。

職場社會,有人一年升一次職,撈到風生水起;有人渾渾噩噩,一世都冇升職既機會。

活到老學到老呢句說話,永遠冇錯!

 

 

 

文章授權轉載自「庸材」:https://www.facebook.com/yungchoi2012

創業周末Startup
Facebook